Елена Рыбакина United Cup командалық турнирін жеңіспен бастады

Аустралияның Сидней және Перт қалаларында аралас командалық сында United Cup турнирі өтуде, деп хабарлайды Skifnews.kz ақпарат порталы.

Қазақстан құрамасы С тобында Испаниямен ойнап жатыр. 

Қазақстанның бірінші, әлемнің 6-ракеткасы Елена Рыбакина бастапқы кездесуін рейтингіде 54-сатыдағы Джессика Бузас Манейромен өткізді.

Бірінші партияда 4:0 есебімен алға кеткен қазақстандық теннисші сол басымдылықты сақтап қалды – 6:2.

Екінші сетте есеп 3:2 болған мезетте Елена брейк жасай білді – 4:2. Содан кейін матчқа доп бергенде, өз мүмкіндігін жіберген жоқ – 6:3.

Қазақстан құрамасы сапында кортқа бірінші болып шыққан әлемнің 78-ракеткасы Александр Шевченко дүниежүзілік рейтингіде 196-орында тұрған Пабло Каррено-Бустадан ойсырай ұтылды – 2:6, 1:6. 

Әзірге Қазақстан – Испания матчында есеп тең – 1:1.

Бүгін өзгеріс болмаса, Рыбакина мен Шевченко жұптық сында да ел намысын қорғайды.