Трамптың араласуынан кейін ФИФА тарихи шешім қабылдады

Футболдан әлем чемпионаты барысында бұрын-соңды болмаған тарихи оқиға тіркелді. Халықаралық футбол федерациясы дүбірлі дода кезінде ойыншыға көрсетілген қызыл қағаздың күшін алғаш рет жойды. Бұл күтпеген шешімге АҚШ президенті Дональд Трамптың тікелей араласуы түрткі болған. "The Guardian" басылымы мемлекет басшысының ФИФА жетекшілеріне қатарынан үш рет хабарласқанын жазды. Ол америкалық спортшының шеттетілуін бұзуды үзілді-кесілді талап еткен, деп хабарлайды Sn.kz ақпарат порталы.

Атышулы дау Босния және Герцеговина құрамасына қарсы өткен матчта басталған еді. Сол ойында АҚШ құрамасының шабуылшысы Фоларин Балогун жасыл алаңнан қуылған болатын. Енді ұйым футболшыны автоматты түрде шеттету жазасын уақытша тоқтатып отыр. Басты себеп ретінде ФИФА тәртіптік кодексінің 27-бабы негізге алынды. Бұл ереже айрықша жағдайларда жазаның күшін тоқтата тұруға толық мүмкіндік береді. Дегенмен қызыл қағаз спортшының жеке тәртіптік тарихында сақталып қала береді.

Дональд Трамп федерацияның бұл әрекетіне дән риза. Ақ үй басшысы ұйымға алғыс білдіріп "үлкен әділетсіздік түзетілді" деп мәлімдеді. АҚШ құрамасының бас бапкері Маурисио Почеттино да осы шешімді толық қолдап отыр. Маман басында Балогунға тым қатаң жаза кесілді деп есептейді.

Бельгияның Корольдік футбол қауымдастығы бұл жағдайды қатаң сынға алды. Олар аталған қадамды бекітілген ережелерге мүлдем қайшы деп бағалады. Қазіргі таңда қауымдастық өкілдері алдағы уақытта қандай қарсы іс-әрекеттер жасайтынын жан-жақты зерттеп жатыр. Ал Бельгия құрамасының бас бапкері Руди Гарсия бұл тосын шешімді бірінші сәуірдегі әзілге теңеді.