Бүкіләлемдік бокс қауымдастығының (WBA) шешімімен Өзбекстандық кәсіпқой боксшы Руслан Чагаев өзінің чемпиондық титулынан айрылды. Аса ауыр салмақта өнер көрсететін Чагаев белбеуін қорғау үшін пуэрторикалық Фрес Окендомен жекпе-жек өткізуі тиіс болатын. Алайда, кездесу орын алмағандықтан қауымдастық өзбек боксшысынан атақ-дәрежесін тартып алды. Бұл туралы оның промоутері Тимур Дугазаев мәлімдеді.
«Русланның денсаулығы сыр беріп жатыр. WBA болса оны чемпиондық атақтан айырғанын айтып хат жолдапты. Себеп — ұзақ уақыт шаршы алаңға шықпауы», — деп атап өтті промоутер.
Айта кетейік, WBA чемпиондық титулды Чагаевқа жекпе-жексіз берген болатын. Яғни, бұған дейінгі әлем чемпионы австралиялық Лукас Браунның допинг пайдаланғаны белгілі болғаннан кейін аталған чемпиондық белбеу осы салмақтағы экс-чемпионға өткен.
Чагаев пен Лукас арасындағы кездесу 5 наурызда өткен болатын. Ол кезде австралиялық боксшы 10-раундта техникалық нокаутпен жеңіске жетіп, WBA нұсқасы бойынша әлем чемпионы атанған еді.