Президент Н.Назарбаевтың межелеген Ұлт жоспары – «100 нақты қадамының» 76-қадамында Экономикалық ынтымақтастық даму ұйымына мүше елдері стандарттарының негізінде
функциялық сауаттылықты дамыту үшін мектептегі оқыту стандарттарын жаңарту және жоғары сыныптарда жанбасылық қаржыландыруды енгізу, табысты мектептерді ынталандыру жүйесін құру кезек күттірмейтін мәселе екендігі атап айтылған. Расында, алдағы жылдарда елді дамытатын да, сол дамыған дәуірдің жемісін көретін де – жас ұрпақ. Қазіргі мұғалімдердің алдында тұрған басты міндет – оқушылардың шығармашылық білім дағдысын қалыптастыру, құзыретті тұлға дайындау. Бұл туралы Қызылорда облысы Қазалы аудандық білім беру бөлімінің басшысы А.Қасымова өз ойларымен бөлісті.
Біз осы орайда ең алдымен мектепке дейінгі оқыту мен тәрбиенің мәнін ашып, оның жан-жақты дамуының бағыт-бұйдасын түзеуіміз керек. Сондықтан оқытудың бірінші сатысында бастапқы тең мүмкіндіктерді қамтамасыз ету үшін, мектепке дейінгі білім беру сапасына үлкен көңіл бөлініп келеді. Қазіргі таңда мектепке дейінгі 19 мемлекеттік мекемеде және мемлекеттік жекеменшік әріптестік шеңберінде ашылған 8 жекеменшік балабақшаларда 2253 бала және 32 шағын орталықтарда 2035 бала қамтылған. Мектепке дейінгі мекемелерде 4288 бала қамтылған болса, «Балапан» бағдарламасы бойынша 3-6 жас аралығындағы балаларды қамту пайызы ауданда 100%-ды құрап отыр. Ендігі кезекте аудандағы 1-3 жас аралығындағы балаларды толықтай қамту үшін бөбекжай топтар мен бөбекжай балабақша ашуға жұмыстар жүргізіліп жатыр. 2016 жылдың 21 тамыз күні Жалаңтөс батыр ауылындағы 90 орындық «Сәуле» балабақшасының жаңа ғимаратының берілуі осы жұмыстардың алғашқы қадамы. Себебі, бұл балабақшада 2 бөбекжай тобы ашылып, оған 30 бала қамтылды.
Қазіргі таңда мектепке дейінгі тәрбие берудің бүкілқазақстандық моделіне өту, оқыту мен тәрбиелеудің соңғы әдіс-тәсілдерін, жаңа инновациялық технологияларын игеру үшін мектепке дейінгі мекемелерде 345 педагог біліктілігін арттырды. Шығармашылықпен жұмыс жасау – мектепке дейінгі білім беру ұйымдары ұстаздарының басты міндеті болып отыр.
1 қыркүйек күні ауданымыздағы 36 мектепте алғашқы қоңырау соғылды. 14115 оқушы Тәуелсіздіктің 25 жылдығына арналған салтанатты жиын барысында Мәңгілік ел патриоттық актісі шеңберінде «Мен өз Отанымның патриотымын» тақырыбында жаңа оқу жылын бастады.
«Мұғалім өзінің білімін үздіксіз көтеріп отырғанда ғана – мұғалім. Оқуды, ізденуді тоқтатысымен оның мұғалімдігі де жойылады». Жаңа формациядағы ұстаздарды дайындау, Ұлт жоспарының 76-қадамы негізінде адам капиталының сапасын көтеру арқылы еліміздің білім жүйесін халықаралық стандарт деңгейіне жеткізу білімді де білікті мамандар дайындауды талап етеді. Қазіргі уақытта аудан мектептерінде 2290 мұғалім қызмет атқарады. Олардың жоғары білімдісі – 2079, арнаулы орта білімдісі – 211. Жоғары санатты – 134 (6%), І санатты – 673 (30,7%), ІІ санатты – 925 (40,5%), санатсыз – 605 (24%). Жоғары, І санатты мұғалімдердің үлесі аудан бойынша жуық шамамен 37 пайызды құрайды.
Биылғы наурыз айында Қазақстанда «Білім беруді және ғылымды дамытудың 2016-2020 жылға арналған мемлекеттік бағдарламасы» бекітілді. Бес күндік оқу аптасының енгізілуі, білім берудің үштілді жүйесіне көшу, бәрі білім беру мазмұнын жаңартуға бағытталған мемлекеттік бағдарламада қарастырылды. Еліміздегі соңғы кезде көбірек айтылып жүрген білім беру мазмұнын жаңарту бағдарламасы оқытудың жаңа әдіс-тәсілдерін енгізу арқылы білім беру жүйесін реформалауға үлес қосуда. Бұл бағдарлама «Назарбаев зияткерлік мектептері» ДББҰ Педагогикалық шеберлік орталығы Кембридж университетімен бірлесе отырып, мектеп пәндерінің оқу бағдарламаларына, оқу жоспарларына және бағалау моделіне негізделген. Бұл бағдарламамен біліктілік арттырған мұғалімдер сабақты модельдеу арқылы оны ой елегінен өткізіп, рефлексия жасап, теориялық білімді өз тәжірибесінде қалай қолдана алуымен қатар, оқушыларға барынша қолдау көрсете отырып, білім беруде. Кез келген мұғалімнің алдында тұрған басты міндеттердің бірі – оқушыны оқу үдерісіне қатысатындай етіп, өздерінің жаңа білімдері мен дағдыларын іс жүзінде өз тәжірибесінде қолдануға болатын құзыреттілігін қалыптастырып, қызықтырып, сабақты белсенді оқуға ықпал ету, қолдау көрсету. Қазіргі таңда оқушылардың инновацияларға ұмтылысы өте жоғары. Бұрынғыдай сабақтың басым бөлігін өздері ғана сөйлеп, «жаулап-төстеп» алып, «тапсырмаларды орында, тыңда, экраннан немесе тақтадан жаттығуларды көшір» уәжі емес, түрлі оқыту мен оқу әдістерін пайдаланатын белсенділік, көп оқушыны қамтитын белсенді тапсырмалар, әр оқушымен жекелей жұмыс, оқушылардың сабақ мақсатын және олардан не күтілетінін біліп отыратындай сабақ бүгінгі талап үдесі. Бұлай айтуымның бір себебі, бүгінгі күнге ауданның 422 мұғалімі, 28 мектеп басшысы біліктілік арттыру курсынан өтіп, жаңаша жұмыс істеуде.
Биылғы жылдың басты ерекшелігі Елбасының «100 нақты қадам» – Ұлт жоспарының 79-қадамына орай 12 жылдық білім беруге, пәндерді ағылшын тілінде оқытуға кезең-кезеңмен көшу жоспарлануда. Республика бойынша жаңартылған білім мазмұны кезең-кезеңімен енгізіледі. Яғни, 2016 жылы 1-сыныптарға, 2017 жылы 1,2,5,7-сыныптарға, 2018 жылы 1,2,3,5,6,7,8,10-сыныптар оқыса, 2019 жылға қарай біз 12 жылдық білім беру жағдайына түгел көшіп боламыз. 2019-2020 оқу жылынан бастап физика, химия, биология, информатика пәндері 10-11-сынып оқушылары үшін ағылшын тілінде оқытылады.
Республика бойынша жаңартылған білім беру мазмұнына көшу үшін мұғалімдерге әдістемелік материалдардың толық ресурсы дайындалды. Олар оқу бағдарламалары, күнделікті сабақ жоспарлары, оқулықтар, мұғалімдерге арналған нұсқаулықтар, бағалау жөніндегі ұсынымдар. Бұл материалдардың барлығы біліктілікті арттыру курстарында мұғалімдерге таратылып берілуде. Ауданда «Білім беру мазмұнын жаңарту жағдайындағы бағдарламалар» бойынша біліктілік арттыру курстарында 2016-2017 оқу жылы 1-сыныпқа сабақ беретін 85 мұғалім біліктілігін арттырды. Оқу пәндері бойынша 35 ағылшын тілі пәнінің, 64 орыс тілі пәнінің, 33 қазақ тілі пәнінің, 41 технология, бейнелеу пәні мұғалімдері, 52 ән-әуез пәні мұғалімдері біліктілігін арттырады. Сонымен қатар «Назарбаев зияткерлік мектептері» педагогикалық шеберлік орталығында 2016-2017 оқу жылында 76 оқытушы-тренер дайындалады. Олар мектептердің мұғалімдерін жаңа оқу жүйесі бойынша жұмыс істеуге кәсіби тұрғыдан үйретіп, тәлім береді.
Сонымен қатар облыс бойынша 22 инновациялық мектептің қатарына біздің ауданымыздағы №266, 249, 16 мектеп-лицейлер мен №226 гимназия кіріп отыр. Бұл 4 мектепте пәндерді ағылшын тілінде оқыту жұмыстары бойынша тиісті қаржы бөлініп, 2016 жылдың қаңтар айынан басталып та кетті. 2016-2017 оқу жылында 5-11-сынып оқушылары ағылшын тілін аптасына 5 сағаттан игерсе, 2018-2019 оқу жылы 10-11-сыныптар оқу пәндерін ағылшын тілінде жұптық оқытуды бастап, 2019-2020 оқу жылы 11-сыныптар оқу пәндерін ағылшын тілінде оқиды. Аталған инновациялық 4 мектептің аясында желілік қауымдастық құрылды.
Өткен оқу жылында аудандағы 33 орта мектептен барлығы 201 оқушы (22,5%) оның ішінде «Серпін – 2050» бағдарламасы бойынша 106 оқушы грант иегері атанып, жоғары оқу орындарына түскен болса, 2015-2016 оқу жылында ҰБТ тапсырған 492 оқушының 250-і оның ішінде «Серпін – 2050» бағдарламасы бойынша грант негізінде 125 түлек жоғары оқу орындарына оқуға түсіп, оқушыларымыздың грант негізіне жоғары оқу орындарына түсуден облыс бойынша ауданымыз алдыңғы қатардан көрінді.
Мектеп – бұл жас ұрпағымызға сапалы білім, саналы тәрбие берумен қатар, халқымыздың ұлттық рухы мен мәдени мол мұраларын қастерлеуге баулитын, оны көздің қарашығындай сақтап, келешектің игілігіне жеткізетін мәдени орын, тағлымның зерделі зертханасы. Сондықтан мектептегі барлық тәрбиенің негізі ұлттық сипатта, халықтық нақышта болуы керек.