Елбасы Нұрсұлтан Назарбаевтың Алматы облысына жасаған сапары барысында мемлекет үшін аса бір маңызды жаңалық айтылды.
Ол шекаралық аймақта салынып жатқан жаңа қалаға байланысты. Сапар аясында Елбасы Панфилов ауданына арнайы ұшып барып, шекара маңында бой көтеріп келе жатқан Нұркент қаласының құрылыс жұмыстарымен танысты. Қала құрылысы 2020 жылы бітпек. Жалпы аумағы 300 гектар жерді құрайтын Нұр шаһарда алдағы уақытта 100 мың адам тұрмақшы. Нұркенттің еліміз үшін маңызы аса зор болмақ.
Біріншіден, шекаралық аймақта, кедендік бекет бойында тұрғандықтан мұнда сауда көрігі қызары хақ. Яғни екі ел арасындағы сауда дәлізі қызметін атқармақ. Екіншіден, шаһарды салуға ондаған мың адам тартылмақшы. Жүздеген жұмыс орны ашылмақ. Мұның өзі тек қала емес, өңірдің гүлденуіне, халықтың әл-ауқаты түзелуіне жол ашпақ. Үшіншіден, шекараның ар жағында қытайлар салған «Қорғас» қаласына қанаттас болмақ һәм қазақтың да қысқа уақыт ішінде іргетасы мықты, тұғыры биік қала сала алатынын көрші жұртқа көрсету. Имидж қалыптастыру. Ең бастысы, еліміздің шекаралық аймақтарда халық санының сирей бастауына тоқтау салатындығы. Бұл – негізгі мәселе. Енді осы шекаралық аймақтар жөніндегі әңгімемізді тереңірек қамтиық.Тәуелсіз ел атандық. Шаңырақ тіктелді. Шекара шегенделді. Көк байрақ көкке көтерілді. Әлемдік геосаясатта орнымыз салмақты. Өркениеттің алдына шықпасақ та, қатарындамыз. Ілкі сәтте елдің тұрмысы әрленді, экономика еселенді. Еңсе түзелді. Қидаласып жатқан өзге жұртпен салыстырмалы түрде қарасақ, ел аман, жұрт тыныш дейміз. Хош. Десек те, кежегесі кейін тартқан түйткілдер бізде де жоқ емес екен. Соның бірі – елдің қауіпсіздігіне айтарлықтай әсер беретін шекаралық аудандар мәселесі. Рас, оңтайландыру саясаты тұсында таратылған шекаралық аудандарды қазір қалпына келтіретін күн туды. Заманның қиын жылдарында ақшаны үнемдеу үшін шекаралық аймақтардағы аудандарды сапырылыстырып, бір-біріне қосып, біріктіру қажеттіліктен туындаған да шығар. Ал қазір еліміздің осы аудандарды қайта қалпына келтіруге мүмкіндігі бар. Тіпті мұның саяси қыры да жоқ емес. Себебі, соңғы жылдары аймақтағы геосаяси жағдайдың күрделенуі мен әлемдік державалардың аймаққа деген күресте ықпалдарының артуы, қауіпсіздік мәселесін одан әрі күрделендіре түсуде. Бұған қоса аймақ мемлекеттерінің әлеуметтік-экономикалық жағдайларының әр алуан болуы, халықтың күнкөріс қамымен жан-жаққа көшуі заңсыз миграцияны күшейте түсуде. Демек, бізге шекараны қымтап, соған тақау жатқан аудандардың әлеуетін арттыру қажеттігі өзінен-өзі туындап отыр. Басылым беттерінде жарияланған мына бір деректерге көз салар болсақ, шекаралық аудандардың мәселесін қайта қарайтын кез жеткенін аңғаруға болады. Мәселен, Шығыс Қазақстан облысы бойынша алсақ 1997 – 2011 жылдар аралығында ғана шекаралық аудандардағы 45 елді мекен еліміздің картасынан жойылып, 20-дан астам мектеп өз жұмысын тоқтатқан. 2012 жылға дейінгі дерекке қарағанда, 15 жыл ішінде шекаралық Зайсан, Қатонқарағай, Күршім, Үржар аудандарынан 85,1 мың адам көшіп кеткен. Сондай-ақ Алматы облысының шекаралық аудандарындағы жағдай да мәз емес. Жалпы, шекаралық аудандар тараған кезде жыл сайын көптеген мектеп жабылып, сол кезеңде 80-ге жуық ауыл толық жойылып кеткені талай мәрте баспасөз бетінде тілге тиек етілді. Қазір де өзгергені шамалы. Егер осы мәселені дереу қолға алып, тиісті шаралар қолданылмаса, жағдайдың асқына беретіні анық. Өйткені шекарамызды қаншалықты шегендедік десек те, сол шекаралық аймақта қара ормандай қаптап, халық отырмаса бәрі бекер. Мемлекеттің тұтастығына төнетін қауіптің бірі осы. Тіпті жер мәселесі көтеріліп, соған арнап құрылған комиссияның бір отырысында «Нұр Отан» партиясы Төрағасының бірінші орынбасары Мұхтар Құл-Мұхаммед, еліміздің шығыс өңіріндегі бес бірдей аудан түгелімен мемлекет меншігінде болуы керектігін айтқан еді. Ол сол аудандар үшін алаңдайтынын жеткізді. Өйткені аталған Шығыс Қазақстан облысына қарасты Үржар мен Зайсан, Алматы облысына қарасты Алакөл, Панфилов, Нарынқол аудандарының аумағы Еуропаның кейбір мемлекеттерінен үлкен. Сондықтан «мұндай шекара маңындағы жерлер мемлекеттің меншігінде қалғаны дұрыс деп есептеймін» деп еді Мұхтар Құл-Мұхаммед. Мәселе орынды айтылды, дер кезінде көтерілді. Ендігі кезек сол шекаралық аудандардың әлеуетін күшейту. Халықтың көшуін тоқтату үшін, жұмыс орындарын көптеп ашып, халықтың күнкөрісіне жол ашу. Дәл осындай игі қадам Нұркент қаласы болмақшы. Мұны жақсылықтың нышаны ретінде қабылдауға болады. Өйткені салынып жатқан шаһар шекаралық аймақты дамытудың алғашқы қадамы болуы тиіс. Мұның өзі сыртқа кеткен жұрттың кері оралуына септігін тигізбек. Дәл осындай ірі жобалар өзге де шекаралық аудандарда қолға алынатын болса, шекарамыз тек шегенделіп қана емес, халықпен қымтала түсетінін де айтқанымыз абзал.