«Қыздар, күйеуге шығыңдар»: Нұржан Керменбаевтың жаңа әні не туралы?

Әнші Нұржан Керменбаев көпшілікке жаңа ән ұсынды. Өнер иесі аталмыш әннің сөзін сынаған тыңдармандарына Instagram желісіндегі парақшасында жауап берді, деп хабарлайды Skifnews.kz ақпарат порталы.

Керменбаевтың Qazaqsha disco әнінің қайырмасында "Күйеуге тиме! Күйеуге тиме! Дей ме, біреулер әлде?" деген жолдар бар. Әншінің айтуынша, желі қолданушыларының арасында әннің қайырмасын түсінбей, сынағандар болған. Нұржан Керменбаев жаңа туындысына сын айтқан оқырмандарына жауап қатып, әннің қайырмасын түсіндіріп берді.

"Қыздар, күйеуге шығыңдар. Отбасы құрыңыздар! Жалпы қыз баланың басты мақсатының бірі сол деп ойлаймын. Біз "күйеуге тиме" деген насихат айтпадық. Автордың бейнелеуі бойынша, жігіт қызға сөз салады. Ал қыз арманымен, қиялымен екі ойлы болып тұрады. Осы кезде жігіт қыздан "Біреу саған күйеуге шықпа деп жүр ме? Құрбыларың, жақындарың тұрмысқа шықпа деп айтады ма?" деп сұрайды. Оны сіздер басқаша бұрмалап алыпсыздар. Негізі біздің айтқымыз келгені мүлде басқа. Сіздердің бұрмалап алғандарыңыз мүлде бөлек", - деді Нұржан Керменбаев.