Антикор QazaqGaz қызметкерлерін тергеп жатыр

Қазақстан Республикасы Сыбайлас жемқорлыққа қарсы іс-қимыл агенттігінің ресми өкілі Арман Тілеукенов 22 қарашада өткен брифингте QazaqGaz қызметкерлеріне қатысты тергеу жұмыстары туралы айтты, деп хабарлайды Skifnews.kz ақпарат порталы. ​

Арман Тілеукенов хабарлағандай, әлеуметтік желілерде "QazaqGaz" АҚ қызметкерлері мен басшылығын Сыбайлас жемқорлыққа қарсы қызмет ұстағаны туралы ақпарат пайда болды. Антикор спикері бұл ақпарат мүлде дұрыс емес екенін атап өтті: департамент тергеу жүргізіп жатыр, бірақ әлі ешкім ұсталған жоқ.

Ведомстволық бағынысты ұйымдардың қызметкерлерінің өкілеттігін асыра пайдалануы мүмкін фактісі бойынша сотқа дейінгі тергеп-тексеру амалдары жүргізілуде. Істің мән-жайы бойынша тергеудің объективтілігі мен жан-жақтылығын қамтамасыз ету мақсатында жедел-іздестіру шаралары жүргізілді. Бұл іс бойынша ешкім ұсталған жоқ. Қазіргі уақытта ешкімге айып тағылған жоқ. Арман Тілеукенов

Антикордың ресми өкілінің айтуынша, тергеу мүддесіне сай басқа ақпарат жария етілмейді.

Қазан айының соңында Антикор бұрынғы әділет министрі Марат Бекетаевтың билігін асыра пайдаланды деген айыппен ұсталғанын растады.