Ақтөбелік мұғалім ауылдасын өлтіріп алды

Ырғыз ауданы Баймен Алманов атындағы орта мектептің мұғалімі ауылдасын өлтіріп алды, деп хабарлайды Skifnews.kz ақпарат порталы.

Оқиға кеше түнде болды.

Ақтөбе облыстық ПД баспасөз қызметінің хабарлауынша, «Suzuki XL7» маркалы автокөлігінің жүргізушісі Ырғыз ауданы Құрылыс ауылында 40 жастағы жаяу жүргіншіні қағып кеткен. Жол-көлік оқиғасы салдарынан жаяу жүргінші оқиға орнында қайтыс болды.

Сараптама актісіне сәйкес жүргізуші мас күйінде болған. Адамның өліміне әкеп соқтырған жол қозғалысы ережесін бұзу фактісі бойынша сотқа дейінгі тергеп- тексеру басталды. Жүргізуші уақытша үстау изоляторына қамалды, - деп хабарлады Ақтөбе облыстық ПД баспасөз қызметінің жетекшісі Ерболат Сарқұлов.

Айта кетейік, жәбірленуші де, күдікті де бір ауылдың тұрғындары. Күдікті – Құрылыс ауылындағы Баймен Алманов атындағы орта мектептің Алғашқы әскери дайындық жетекшісі.

Оқиғаны түнде естідім. Ол қазір еңбек демалысында жүрген адам. Өте өкінішті нәрсе. Күдікке іліккен Ерік Суханберлин жақсы мұғалім еді. Қолынан келсе көмектеседі, шығармашыл адам. Ән айтады, поэзияға жақын. Отбасы үлгілі. Өзі мектепте 14 жыл жұмыс істеді. Бұл жағдай қай-қайсысына да оңай емес, - деді Баймен Алманов атындағы орта мектептің директоры Нұргүл Қалмағамбетова. 

Айта кетейік, күдікке іліккен мектеп мұғалімі 36 жаста, отбасылы.