Көлдегі бейбастық: ШҚО-да тізгінсіз катер демалушыларды таптай жаздады

Шығыс Қазақстан облысындағы шипажайлардың бірінде қайғылы жағдаймен аяқталуға шақ қалған төтенше оқиға болды, деп хабарлайды Sn.kz ақпарат порталы.

Су айдынындағы қауіпсіздікті бақылауға тиіс жергілікті әкімдік пен жауапты органдардың салғырттығынан, ішіне адам мінгескен «банан» аттракционын сүйреген катер басқарусыз қалып, шомылып жүрген жұрттың ортасына лап қойды. Жоғары жылдамдықпен үйірілген техниканың астында қала жаздаған халықтың өмірін сол маңдағы прокат қызметкері аман алып қалды: ол ағып бара жатқан катерге секіріп мініп, қозғалтқышын өшіріп үлгерген. Жыл сайын қайталанатын осы тектес жайттар аймақтағы су көліктерінің қозғалысы мүлдем қадағаланбайтынын және жағажайдағы қауіпсіздік шараларының тек қағаз жүзінде қалып отырғанын кезекті рет дәлелдеді. Жергілікті билік пен құзырлы инспекциялар демалыс орындарындағы заңсыз бизнес пен тәртіпсіздікке көз жұма қарауын қашан қояды және бұл бейбастақтыққа нақты шектеу қойыла ма деген сұрақ ашық күйінде қалып отыр.