16 жасқа дейінгі балалардың әлеуметтік желіге кіруіне тыйым салынады

Қазақстанда 16 жасқа толмаған балалардың әлеуметтік желілерде тіркелуіне тыйым салу жоспарланып отыр. Үкімет тиісті заң жобасын әзірлеп, оны маусым айында Парламентке енгізген. Бұл туралы Президент Қасым-Жомарт Тоқаев Астанада өткен педагогтердің тамыз конференциясында айтты, деп хабарлайды деп хабарлайды Sn.kz ақпарат порталы.

Мемлекет басшысы балалардың цифрлық ортадағы қауіпсіздігіне қатысты қолданыстағы тәсілдерді қайта қарау қажет екенін атап өтті. Оның айтуынша, туындаған мәселелермен ғана күресіп қоймай, кәмелетке толмағандарды ықтимал қауіпті контенттен алдын ала қорғау маңызды.

Президент Үкімет әлеуметтік желілердегі жас шектеуіне қатысты заңнамалық өзгерістерді әзірлегенін айтты.

Үкімет әлеуметтік желілерде 16 жасқа толмаған пайдаланушыларды тіркеуге тыйым салуды көздейтін заң жобасын әзірледі. Маусым айында заң жобасы Парламентке енгізілді. Құрылтайдың бірінші сессиясының ашылуында депутаттарға осы мәселелерді қарауды ұсынамын, – деді Президент.

Тоқаев мұндай шектеулердің басқа елдерде де енгізіліп жатқанын атап өтті. Оның пікірінше, Қазақстанда да кәмелетке толмағандардың психологиялық жағдайына төнетін қауіптердің алдын алуға көбірек көңіл бөлу қажет.

Меніңше, біз де салдармен күресуден балалардың психологиялық жағдайына төнетін қауіптердің алдын алуға көшуіміз керек. Әйтпесе бұл қоғамдағы тұрақтылыққа кері әсер етуі мүмкін, – деді Мемлекет басшысы.

Президент интернеттегі кәмелетке толмағандарға қолжетімді контентті сүзгіден өткізу мәселесін де көтерді.

Тоқаев балалардың интернеттегі қауіпсіздігіне қатысты жауапкершілікті тек ата-аналарға жүктеуге болмайтынын айтты.

Үкімет балаларды қорғау мақсатында контентті сүзгіден өткізу бойынша шаралар қабылдауы керек. Қазір ата-аналардың жауапкершілігіне ғана сүйенуге болмайды. Бұған бірқатар белгілі әрі объективті себеп бар, – деді Президент.

Мемлекет басшысының бұл сөзінде контентті сүзгіден өткізудің нақты тетіктері айтылған жоқ.

Қасым-Жомарт Тоқаев балаларға арналған міндетті SIM-карталарды енгізу ауқымын кеңейтуді де тапсырды.

Мұндай SIM-карталар кәмелетке толмағандарды цифрлық кеңістіктегі қауіптерден қорғаудың қосымша құралы ретінде қарастырылмақ.

Сондықтан балаларға арналған міндетті SIM-карталарды енгізу ауқымын кеңейтуді тапсырамын. Олар ақпараттық иммунитетті қамтамасыз етуге мүмкіндік береді, – деді Мемлекет басшысы.