Ақтөбеде үйлері өртенген тұрғындар сыртқа қалай шыққандарын айтты

Абырой болғанда тұрғындардың бәрі дін аман. От түстен кейін Әбілқайыр хан даңғылы бойындағы осы үйдің үшінші қабатындағы балконнан тұтанған. Санаулы минутта жалын шатырына дейін жетті.

Үйдің балкондары мен сырты пластикалық материалмен қапталған. Оттың тез тарауына бұл да себеп болды. Өрт шыққанда үйде екі жүздей тұрғын болған. Олардың көбісі не болып жатқанын түсінбей қызыл жалын алған балконға қарай жүгіреді. Не істерлерін білмей абдырағандарын айтады. Өрттің сөнгеніне үш сағаттай болса да тұрғындардың көбісі әлі өз-өздеріне келе алмай жүр. Пәтерлерінен қолдарына не түссе соны алып жүгірген.

«Өртті көріп подьезге жүгіріп шықтым. «Көмектесіңдер» деп айқайға бастым. Тек тонымды алыппын. Оны неге алғанымды бір құдай білсінші. Есесіне құжаттарым жангып кетті», - дейді тұрғындардың бірі.

Өртті сөндіруге қаладағы барлық құртқару бөлімдерінің мамандары, өрт сөндіретін 7 көлік тартылды. Жедел жәрдем мен дәрігерлер де келді. Ауыр жарақат алғандары жоқ. Мамандар сол үйден шыққан балаларды тексертіп алып жатты. Сондай-ақ қорқып қалған тұрғындарға психологиялық кеңестер берілді. Бірнеше тұрғынның осы аламат өрттен соң қан қысымы көтерілген. Оларға дәрі-дәрмегі берілді.

«Өрттен зардап шеккендер туралы ақпарат түскен жоқ. Ешқандай адам қабылданған жоқ. Өздерің көріп тұрғандай жедел жәрдем тұр. Біздің медициналық орталық тұр», – дейді Ақтөбе облыстық ТЖД басшысының орынбасары Ернұр Өтегенов.

Бір подъездің жоғарғы 6-қабатындағы пәтердің барлығы қазір жарамсыз. Отты сөндірген кезде төменгі қабаттағы пәтерлерді де зақымданған. Қанша тұрғынның баспанасыз қалғаны, қанша пәтердің жарамсыз болып қалғанын комиссия тексеріп жатыр. Оқиға орнына аймақ басшысы да қарамағындағы қызметкерлерін алып жеткен еді. Олар тұрғындарға барлық жағдайды жасаймыз деп уәде беріп отыр.