$ 444.32 € 473.33 ₽ 4.76
Полицейлер Қарағанды облысының аумағынан құны 14 миллион теңгеден асатын 50 жылқыны ұрлаған ер адамды ұстады, деп хабарлайды Skifnews.kz ақпарат порталы, Ақмола облысының ПД баспасөз қызметіне сілтеме жасап.
26 қарашада Шалқар ауылының 41 жастағы тұрғынынан Қорғалжын аудандық полиция бөліміне 50 бас жылқының жайылымнан жоғалғаны туралы хабарлама келіп түсті. Иесі келтірілген зиянның мөлшерін 14 миллион 50 мың теңгеге бағалады.
Жәбірленушінің хабарламасы тіркеліп, Қазақстан Республикасы Қылмыстық кодексінің «Ұрлық» бабы бойынша сотқа дейінгі тергеу басталды.
Жедел-іздестіру шаралары барысында полицейлер жоғалған 50 жылқының 28-ін тапты. Барымташы оларды Қарағанды облысы, Нұра ауданы, Амантау ауылынан алыс емес жердегі қыстағында жасырған.
Тәртіп сақшылары бұрын сотталған 23 жастағы Нұра ауданының тұрғынын анықтап, ұстады.
«Қазіргі уақытта қалған малдың қайда екені іздестіріліп жатыр. Қаскүнем ұрланған жылқылардың бір бөлігін кәдеге жаратып үлгерген. Сондай-ақ, оның банкке қарызы болғаны анықталды. Ол жылқымен несиесін жабуды көздеген», - деп хабарлады ПД-нің баспасөз қызметі.
Қазіргі уақытта күдікті уақытша ұстау изоляторына қамалды.
