«Жас Алаш» газетіндегі ауыс-түйіс: Руслан Ерботаның орнына Инга Иманбай редактор болды

Республикалық «Жас Алаш» газетін 3 жыл басқарған Руслан Ербота бас редакторлық қызметінен кетіп жатыр. Қайда баратыны белгісіз. Белгілісі – оның орнына жас журналист Инга Иманбай жайғасуда, деп хабарлайды Skifnews.kz ақпарат порталы.

Ол туралы Руслан Ерботаның өзі facebook парақшасына былай деп жазды:

«Кейде мен ақылға симайтын тәуекелге барғышпын. Үш жыл бұрын қаламақысы өте керемет, жүрегіме жақын, Еуропаның төріне барып тұруға мол мүмкіндік беретін қолымда тұрған жұмысымды тастап, Алматының қуықтай пәтеріне квартирант боп көшіп келдім.

Газеттің бас редакторы болу мақсатым емес еді. Оның үстіне бас редактор қызметі не қаржылық, не материалдық пайда ретінде көрінген емес.

Менің әлсіздігім акционердің «Руслан, газетті сату ойыма да кірген емес, сатсам баяғыда сатар едім. Сатпаймын да. Екіншіден, Алтынбек ағаңның армандаған мемлекеті енді орнамас. Бірақ, «Жас Алаш» оның көзіндей, листовкаға айналдырмай, бір адамға қадалып қалмай, өйткені, ертең ол кеткенде газет бірге кетеді, жалпыға ортақ, ешкімге бүре тартпайтын нағыз газет жасасақ, кейін ағаңа, ана жаққа барғанымда жүзім ашық болар еді» деген сөзінен аттап өте алмай қалғаным.

Сонымен осы жылдары біраз қиындықты еңсердік, біраз жетістікке жеттік. Мұхтар Мағауиннің «Жас Алашқа» тұрақты автор боп келуінің өзі газет ісін түсінетін жанға қаншалықты мәртебе екені айтпаса да аян.

Газет тиражын құлатпай ұстап тұрдық, сайттың күндік оқылымын он мыңнан асырдық.

Газеттің әлеуметтік парақшаларындағы оқырман қатарын робот жалдамай, виртуальды айналымға салмай, тірідей көбейттік. Осының бәрін санаулы ғана редакция қызметкерлері газет бюджетіне салмақ түсірмей атқарып шықты. Ұжымдағы әріптестерімнің осындай ерен еңбектеріне алғысым шексіз.

Қиын қыстау кезінде ісімізге дем беріп, қолдап қоштаған оқырмандарымызға мың да бір рақмет айтқым келеді. «Дәуір» баспаханасында басылып жатқан газетті ақордадағылар талай мәрте тоқтатып тастағанда, таңға дейін дауласып айқасқан шағымызда біз артымызда тұрған қымбатты әрі қадірлі оқырманымызға ғана сендік. Сол сенім бізді талай сынақтан сүріндірмеді.

Өмірлік мұратым деген жолда ағайын-туыс, дос-жаранмен де қарым-қатынасымды үзіп алдым, қайтемін, бұл да бір өмір сынағы шығар.
Газеттің ендігі бағыты, тағдыры қалай боларын, жаңа редакторы «Жас Алаштың» дәстүрін сақтар-сақтамасын, листовкаға айналар-айналмасын немесе бір партияның қолшоқпары болар-болмасын және де басқаларын енді акционер біледі.

Газеттің ендігі бас редакторы Инга Иманбай».