«Амангелді жағымды жаңалықтың жаршысы болған жампоз жан еді» - Аида Балаева

Сұм ажал арамыздан тағы бір әріптесімізді, белгілі журналист, спорт комментаторы Амангельді Сейітхан ағамызды мезгілсіз алып кетті, деп жазды ҚР Ақпарат және қоғамдық даму министрі Аида Балаева Facebook-тегі парақшасында.

Аида Балаева Амангелді Сейітхан талайды тәнті еткен талантымен де, кәсіби шеберлігімен де, аңқылдаған ақжарқын көңілімен де көрерменді баурап, әлемнің алты бұрышынан алашына жағымды жаңалықтың жаршысы болған жампоз жан, жалынды азамат еді деп еске алды. 

Сөз жоқ, Амангельді Муатханұлы өзінің білімі мен егемендіктің алғашқы жылдарында спорт тележурналистикасында алған құнды тәжірибесін жастармен бөлісіп, ізін басқан мамандарға үйретіп кетті. Десе де, табиғатынан ақындығы мен адами асылдығы жарасқан тұлғаның өткен жолы да, халықтың жүрегінде алар орны да бөлек болып қалары анық. Ал оның есімі отандық тележурналистика тарихына ғана емес, тұтастай спорт шежіресіне алтын әріппен жазылады. Басқа түскен осынау қайғыға ортақтасып, марқұмның отбасы, туған-туыстарына көңіл айтамын, - деді министр.

Айта кетейік, бүгін белгілі спорт коментаторы, журналист Амангелді Сейітхан 52 жасына қараған шағында өмірден өтті.