$ 479.38 € 531.63 ₽ 5.27
Кәсіпқой бокстан орта салмақта Қазақстан намысын әлемде қорғап жүрген боксшы Қанат Исламның (22-0, 18 КО) ақпан айындағы жекпе-жегінде кіммен жұдырықтасатыны белгілі болды.
Отандасымыз алғашқы орта салмақта өнер көрсететін бразилиялық боксшы Робсон Ассиспен күш сынаспақ. Латынамерикалық спортшының еншісінде 16 жеңіс, үш жеңіліс бар. 9 жекпежегін ол нокаутпен аяқтапты.
Бұған дейін хабарланғандай, Қанат Ислам кіші Рой Джонс өнер көрсететін бокс кешінде шаршы алаңға шығады. Айтулы жекпе-жектер 17 ақпан күні АҚШ-тың Уилмингтон (Делавэр штаты) қаласында өтеді. Бұл кездесуде Ислам өз титулын қорғамақ. Оның кездесуі 10 раундқа созылады.
Естеріңізге салайық, Қанат Ислам өзінің соңғы жекпе-жегін 29 қазан күні Алматыда ганалық Патрик Аллотейге қарсы өткізген болатын. 12 раундқа созылған кездесуде жерлесіміз ұпай саны бойынша қарсыласынан басым түсті.
