Головкин мен Уэйд бетпе-бет кездесіп, баспасөз мәжілісін өткізді (ВИДЕО)

Кәсіпқой бокстан орта салмақтағы әлем чемпионы, WBA (Super), IBO, IBF және WBC (Interim) чемпиондық белбеулерінің иегері қазақстандық Геннадий Головкин мен оның келесі қарсыласы атанған америкалық Доминик Уэйд бетпе-бет кездесу рәсімін өткізді.

Аталған кездесу Нью-Йоркте өткен баспасөз мәжілісінің аясында ұйымдастырылып отыр. Брифингте қос боксшы журналистердің сауалдарына жауап беріп, алдағы кездесуге дайындықтарын пысықтады. Айта кетейік, бұған дейін Лос-Анджелесте өткен брифингке Уэйд келе алмай қалған болатын, оның ұшағы ауа райының қолайсыздығына байланысты әуеге көтерілмеген.

Ал, жекпе-жектің өзі 23 сәуірде өтеді. Бұған дейін қазақстандық боксшы кәсіби бокс алаңында 34 кездесу өткізіп, оның барлығында жеңіске жеткен болатын, 31-і нокаутпен. Ал, Уэйд болса 18 жекпе-жектің 18-де жеңіске жетіп, 12-ін нокаутпен аяқтаған.