Алматыда жалған фирмалар арқылы 3,9 млрд теңге иемденген қылмыстық топ құрықталды

Алматы қаласында жалған фирмалар арқылы ақша жымқырумен айналысқан қылмыстық топ ұсталды, деп хабарлайды Skifnews.kz ақпарат порталы, Қаржы министрлігі Қаржы миониторингі комитетінің Алматы қаласы бойынша Экономикалық зерттеулер департаментіне сілтеме жасап.

Қылмыстық топтың құрамында қаржы полициясының бұрынғы қызметкері, екінші деңгейлі банктің басқарушы қызметкерлерінің бірі болған. Олар 2017-2019 жылдар аралығында 7 жалған фирманың банк шоттары арқылы 3,9 млрд теңгені қолма-қол ақшаға айналдырған.

Қазір 6 күдікті сот процесін күтіп, қамауда отыр. Сонымен қатар, олардың мүліктеріне тыйым салынды. Атап өтілгендей, 2019 жылдың 22 тамызы мен 31 желтоқсаны аралығында Экономикалық зерттеулер департаменті күмән тудыратын мәмілемен байланысты 41 істі сотқа жіберген.

Прокуратура арқылы экономикалық сотқа 820 арыз берілді. Бұл істер бойынша күмән тудыратын компаниялармен құны 123 млрд теңгеге мәмілелер жасалған.