Атырауда экстремизмді насихаттаған адам 53 мың теңге айыппұлмен құтылды

Атырауда Facebooк-тегі жеке парақшасында діни араздықты қоздыратын ақпараттар жариялаған азамат жауапкершілікке тартылды, деп хабарлайды ҚазАқпарат.

Атырау қаласының мамандандырылған әкімшілік сотында ҚР Әкімшілік құқық бұзушылық туралы кодекстің 453-бабы 2-бөлігі бойынша іс қаралды.

«Іс материалдарына сәйкес, 2019 жылғы 12 желтоқсанда Атырау облыстық Дін істері басқармасының мамандары әлеуметтік желіде мониторинг жүргізген. Мониторингтің нәтижесінде, құқық бұзушы А.-ның Facebooк-тегі жеке парақшасында дiни араздықты қоздыруды насихаттауға бағытталған материалдарды салғаны және таратқаны анықталды.

Дінтану сараптамасының қорытындысына сәйкес, құқық бұзушы А.-ның Facebooк-парақшасында жүктеген материалдары экстремизмді насихаттайтыны дәлелденді», - деп хабарлады облыстық соттың баспасөз қызметінен.

Сот құқық бұзушыны кінәлі деп танып, 53 020 теңге айыппұл салу түрінде жаза қолданды.