Чек талап ет те, автомобиль ұтып ал!

Акцияның мақсаты - қоғамдық белсенділікті арттыру, тұтынушылардың құқығын қорғау және сауда жасау мен қызмет көрсету кезіндегі құқықтық мәдениетті қалыптастыру, кәсіпкерлерді адал бәсекелестікке үгіттеу.

Осылайша Астана қаласы бойынша Кірістер департаменті азаматтарға салық заңнамасының сақталуына бағытталған науқанға қатысып, құнды сыйлықтар ұтып алу мүмкіндігін тудырып отыр.

Биыл да акция былтырғыдай «Wipon» мобильді қосымшасы арқылы жүзеге асатын болады. Аталған қосымшаны кез-келген азамат Apple App store және Google Play market-тен тегін жүктеп ала алады. Ал, науқанның өзіне Қазақстан Республикасының кез-келген азаматы қатыса алады. Олар тек сатып алған тауарының немесе қызметінің чегын суретке түсіріп жіберуі керек. Ал, егер сатушы чек бермеген жағдайда оның үстінен департамент мамандарына шағым түсіре алады.

Науқанға екі рет қайтара жолданған чектер қатыса алмайды.

Акция аясында чектерді қабылдау биыл 21 мамырдан 30 қарашаға дейінгі аралықта жүргізіледі. Осы уақыт аралығында еліміздің барлық облысында, Астана мен Алматыда құнды сыйлықтар ойнатылады. Финал жыл соңында ҚР Қаржы министрлігі Мемлекеттік кірістер комитетінде өтеді. Бас жүлде - автомобиль.

Жеңімпаздар кездейсоқ таңдау арқылы анықталады. Сондықтан қаншалықты көп чек жолдасаңыз, соншалықты жеңіске жету мүмкіндігі артады.