«Неге сонша қатыгез?»: Қарағандыда бір топ ер адам мүгедек баланың арбасын сындырып тастаған

Қарағандыда бір топ ер адам сал ауруына шалдыққан жасөспірімнің арбасын сындырып тастаған, деп хабарлайды Skifnews.kz ақпарат порталы. 

Мүмкіндігі шектеулі жасөспірімнің анасы Зара Ахметованың айтуынша, бұзақылардың екеуі 17 жаста, қалғаны ересек ер адамдар, ермек үшін ұлының арбасын сындырған.

Отбасы тоғызыншы қабатта тұрады екен, ал мүгедектер арбасын лифтке сыймағандықтан бірінші қабатта қалдыруға тура келеді. Кіре берісте бейнебақылау камерасы бар, деп жазады Stan.kz.

"Адамдардың адамгершілігіне үміттеніп, арбаны төменгі қабатта қалдырамыз деп шештім. Бұл велосипед, тіпті балалардың шанасы да емес. Бұл мүгедектер арбасы. Арба өте қымбат, мен ерекше баланың анасы ретінде оны қазір сатып ала алмаймын. Көзіме жас алып, жүрегім ауырып жазып отырмын. Менде бір ғана сұрақ бар: бұл балаларды кім тәрбиелеген? Неге сонша қатыгез? Менің балам қазір таза ауада серуендеу сияқты кішкентай қуанышынан да айырылды", – делінген Зара Ахметованың жазбасында.

Жасөспірімнің анасының айтуынша, бұзақылар ұсталған, бірақ олар өз кінәларын мойындау былай тұрсын, не бүлдіргендерін де түсінбеген.

"Мен таң қалдым. Олар өздерін кінәлі деп санамайды. "Неге біздің арбаға отырдың?" деген сұрағыма "жай ғана отырғым келді” деп жауап берді. Жігіттер өздерін өте әдепсіз ұстады! Тіпті, бірі менің оларды Instagram парақшамда жариялауға қандай құқығым бар екенін сұрап, ашуланды. (...) Менің балам арбасыз өмір сүре алмайды, бірақ менімен ешкім хабарласып, кешірім сұрамады. Бесеуі полиция бөлімшесінен шығып, жай ғана кетіп қалды", – дейді әйел.

Қуанышқа орай, белгісіз біреу отбасына жаңа арба сыйлаған. Оқиғаға қатысты қылмыстық іс қозғалды.