$ 449.3  489.69  4.89

Асановпен кездесуді талап еткен бір топ адам Жоғарғы сот алдында түнеп шықты

Асановтың қабылдауына кіру үшін толтыратын арнайы бланк бар екен. Алайда іс жүзінде Асанов жылдар бойы ешкімді қабылдамаған.

"Әділетсіз сот шешімдері мен үкімдерге" наразы бір топ адам Жоғарғы сот ғимараты алдында түнеп шықты, деп жазады Азаттық.

 Қазақстанның түкпір-түкпірінен келген 25 адам өздері мен жақындарына шыққан сот шешімдерін қайта қарауды және Жоғарғы сот төрағасы Жақып Асановпен кездесуді талап етіп тұр.

"Асановпен кездеспейінше бұл жерден кетпейміз" деді наразы топ 16 маусымда таңертең Азаттық тілшісіне.

– Кеше күндізгі сағат 11-ден бастап осы жерде тұрмыз. Бізді Асанов қабылдасын. Түнде осында креслода ұйықтадық. Ешкім қуған жоқ. Бір әйелдің жағдайы нашарлап, жедел жәрдем шақырып едік, келмей қойды, - деді наразылардың бірі Мадина Көкетаева.

Оның сөзіне қарағанда, жиналғандар арасында Алматы, Қарағанды, Өскемен, Шымкент, Атырау, Ақтөбе, Оралдан келгендер бар.

- Асановтың қабылдауына кіру үшін толтыратын арнайы бланк бар екен. Алайда іс жүзінде Асанов жылдар бойы ешкімді қабылдамаған. Кеше оның кеңесшілері, судьялар мен кеңсе қызметкерлері шықты. Бізді судьялармен кездестіреміз деді. Бірақ біз бұл инстанциялардан өтіп кеткенбіз. Президент әкімшілігі жанындағы комиссиядан да өткенбіз. Нәтиже болмайтынын түсінгенбіз. Асановпен кездестірмейінше бұл жерден кетпейміз, - деді Мадина Көкетаева.

Өзінің "алаяқтықтан зардап шеккенін" айтқан алматылық белсенді Ильшат Кензин он жылға жуық уақыттан бері кінәлі адамның жазалануын талап етіп келеді. Белсенді жөнінде жергілікті сайттар көп жазған. Оның айтуынша, осыған дейін Алматы қалалық соты айыпталушыны ақтап шыққан. Ол сот шешіміне наразы азаматтардың басын қосқан "Әділет" бастамасының авторы.

Жоғарғы сот ғимараты алдына жиналғандардың әрқайсысының шағымы әртүрлі. Бірақ олар өз істері бойынша тергеу қайта жүргізіліп, қайта қаралуын талап етеді.

Қазақстанда сот шешіміне наразы азаматтар наразылыққа жиі шығады. Ақпан айында Ақордаға барып, "әділетсіз сот шешіміне шағымданған" наразы топ "Қазақстаннан әділдік таппаса, шетелден көмек сұрайтынын" мәлімдеген. Сол кезде оларды қабылдаған президент көмекшісі Тамара Дүйсенова "жұмыс тобы құрылатынын, оның құрамына наразылардың бірі енгізілетінін" айтқан.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары