Испандық теннисші қыз Гарбинье Мугуруса «Үлкен дулыға» сериясындағы «Уимблдон» турнирін алғаш рет жеңіп алды. Финалда ол даңқты америкалық теннисші Винус Уильямстан 7:5, 6:0 есебімен басым түсті.
Матчтың алғашқы сетінде 23 жастағы испан қызы 4:5 есебімен жеңіліп тұрған болатын. Мұнан кейінгі геймдердің бәрінде ол мүлдем жеңілген жоқ. Осылайша Мугуруса «Үлкен дулыға» сериясындағы екінші турнирдің чемпионы атанып отыр. Бұған дейін испан теннисшісі Франция ашық біріншілігі - «Ролан Гарроста» жеңіске жеткен еді.
«Уимблдон» турнирінен кейін WTA рейтингінде Мугуруса 15-орыннан бірден 5-орынға жоғарылады.
Айта кетейік, «Уимблдонның» ерлер арасындағы финалы ертең өтеді. Ақтық сында хорват Марин Чилич (ATP-6) пен швейцар теннисшісі Роджер Федерер (ATP-5) өзара мықтыны анықтамақ.