Елімізде қашықтан жұмыс істеу ережесіне түзетулер енгізілмек

Қазақстанның еңбек заңнамасына өзгерістер енгізілмек. Мәжіліс қашықтан жұмыс істеу бойынша түзетулерді қарастырып жатыр, деп хабарлайды Stan.kz.

"Қазіргі кезде қызметкерлерді қашықтан жұмыс істеуге ауыстыру тәжірибесі еңбек заңнамасын жетілдіру қажеттілігін көрсетті. Осыған байланысты заң жобасы қашықтан жұмыс істеуге байланысты еңбек қатынастарын реттеуді көздейді. Уақытша және аралас жұмыс, жұмыс кестесін, жұмыс уақытын, қызметкер мен жұмыс берушінің жауапкершілігін белгілеу сияқты жаңа жұмыс режимдерін енгізу ұсынылады", - деді палата отырысында мәжілістің әлеуметтік-мәдени даму комитетінің төрайымы, депутат Жәмилә Нұрманбетова.

Ол заң жобасының қабылдануымен оң құқықтық және әлеуметтік-экономикалық салдарлар күтілетінін атап өтті.

Мәжіліс "Қазақстан Республикасының Еңбек кодексіне қашықтан жұмыс істеуді құқықтық реттеуді жетілдіру мәселелері бойынша өзгерістер мен толықтырулар енгізу туралы"заң жобасын талқылауды бастады. Мәжіліс комитеті қорытындыны 2021 жылдың 22 желтоқсанына дейін дайындауды жоспарлап отыр.